კულტურის ძეგლები

არქიტექტურული ძეგლები
იმერეთი მდიდარია არქიტექტურული ძეგლებით, ისტორიული მნიშვნელობის მქონე ნაგებობებით.
ყველა მუნიციპალიტეტში და რეგიონულ ცენტრ ქუთაისში ფართოდაა წარმოდგენილი ძეგლები, რომლებიც
ფაქტობრივად საქართველოს ისტორიულ წარსულს შეესაბამება და ამავდროულად თვითმყოფადობითაც
გამოირჩევიან. მათ შორის აღსანიშნავია ტაძრები, ეკლესია-მონასტრები (ბაგრატის ტაძრის ნანგრევები,
მოწამეთა, გელათის სამონასტრო კომპლექსი), ციხეები (თამარის ციხის ნანგრევები), ხიდები. იმერეთში 250-ზე
მეტი ისტორიული ძეგლია, რომლებიც გვიანი ანტიკური ხანიდან ვიდრე მე-20 საუკუნის დასაწყისამდე ნათელ
წარმოდგენას უქმნიან სტუმარს ქართული თვითმყოფადი უმდიდრესი კულტურისა და ისტორიის შესახებ. მათ
შორის აღსანიშნავია ქუთაისის მახლობლად, სათაფლიის ნაკრძალში აღმოჩენილი დინოზავრის ნაკვალევი.
საქართველოს სულიერ ცხოვრებაში იმერეთი ყოველთვის გამორჩეულ როლს ასრულებდა. X საუკუნეში
ქუთაისში მეფედ აკურთხეს გაერთიანებული საქართველოს პირველი მეფე ბაგრატ III, ხოლო XI ს-ის ბოლოს აქ
მეფედ ეკურთხა საქართველოს უძლიერესი მეფე დავით აღმაშენებელი. 1122 წლამდე საქართველოს სამეფოს
რეზიდენცია ქუთაისში იმყოფებოდა. განსაკუთრებული მნიშვნელობა აქვს, რომ გელათის მონასტერი (XII ს.)
ერთდროულად რელიგიურ და საგანმანათლებლო ცენტრად იქცა სრულიად საქართველოსათვის. 400 წლის
განმავლობაში გელათის აკადემია ერთ-ერთი უძლიერესი სამეცნიერო ცენტრი იყო მთელს მსოფლიოში.
იმერეთის ორი ძეგლი: გელათის მონასტერი და ბაგრატის ტაძარი მსოფლიო კუტურის საგანძურშია
შეტანილი.